Палатаның тау-кен клубы: «Галстуксыз кездесу – 2»

Өткен сенбіде Қазақстан тау-кен палатасының тау-кен клубы сала өкілдерін Үлкен Алматы шатқалындағы Шүкір сарқырамасына апаратын бағыт бойынша кезекті бейресми кездесуге жинады.

Жорыққа Fortescue, B2Gold, CAIER және Bai Tau Minerals компанияларының өкілдері қатысты. Маршрут «Альпийская Роза» демалыс орнынан басталып, Ай алаңқайы арқылы шамамен 2 600 метр биіктікте орналасқан Шүкір сарқырамасына дейін жалғасты.

Бірнеше сағаттық жаяу көтерілу, таза тау ауасы мен әсем көріністер бейресми қарым-қатынас үшін тамаша орта қалыптастырды. Конференц-залдар мен ресми күн тәртібінен тыс жағдайда қатысушылар бір-бірін жақынырақ танып, жаңа идеялармен бөлісті. Кейде тиімді нетворкинг үшін ең қолайлы орын — дәл осындай тау соқпақтары.

Жорық аяқталған соң қатысушыларды «Альпийская Роза» мейрамханасындағы ортақ түскі ас күтті.

Палатаның Тау-кен клубы өз кездесулерін жалғастыра береді. Өйткені Палата — бұл тек іскерлік іс-шаралар мен кәсіби диалог алаңы ғана емес, сонымен қатар ресми алаңдардан тыс уақытта да бірге уақыт өткізуге қызығушылық танытатын адамдардың қауымдастығы.

Тауларда жаңа кездескенше!